Ang Pinakamahabang Gabi

Sa bawat patak ng ulan,

Alam kong mahal kita.

Sa bawat kulog at guhit ng kidlat,

Ikaw lang ang naaalala

Sa basang lupang tinatapakan,

Ikaw ang naamoy

At pag dumampi na sa pisngi ko ang ulan,

Naghahalo ang siphayo at panaghoy

Sa bawat ihip ng hangin

Sa dalampasigan man o papawirin,

Wala akong nais pang maatim

Kundi pagdampi ng labi mo sa akin

Sa bawat yapak ng ating paa

Bawat pawis, buntong hininga

Ang hawak mong mahigpit sa aking kamay

Sa pusong naligaw, ikaw ang gabay

Sa bawat bituin na aking nakikita,

Ikaw, at ikaw pa rin ang naalala

Gabing madilim, bulalakaw sa kalangitan

Ang iyong mga matang hindi ako mangitian

Hamog ng gabi, pawis mo sa katawan

Mga anino sa dilim, nagbubunyi sa karimlan

Lahat ng ito, nagpapaalala sa’yo

Ngunit nasaan ka, iniwan mo ako.

Sa bawat paglubog ng araw,

Wari ko, lalo kitang minamahal

Sa bawat pamaaalam ng liwanag

Dilim at lungkot ako’y dinadalaw

Mukha mo’y di ko na maaninag,

Di masundan kilos mo’t galaw,

Natatakot na ako’y maligaw,

Di kita mahanap, mahal ko, ikaw

Sa bawat hampas ng alon, patuloy kitang mamahalin

Hanggang ang puso mo’y matutong  bumalik sa akin.

Hangga’t kaya ng puso magmahal, mamahalin kita.

Kahit ika’y mapagod, at ako’y kalimutan na

Kahit ika’y nasa malayo, at ako’y narito

Magmamahal sayo, ditto sa isang dako

Kung ang puso mo’y maligaw at di na makabalik

Magmamahal pa rin sayo nang walang kapalit.

Ang pagmamahal na binigay ko sa'yo ay walang kapalit. Magpapatuloy ito hanggang sa mapagod ang puso kong magmahal. Uulit-ulitin kong dadaanan ang bawat sulok, ang bawat kalye na ating dinaanan, magiging masaya ako sa bawat sandali na ako'y mababasa ng ulan dahil alam kong sa ganoong paraan lang kita makakasama. Ang mga puno, ang basang lupa, ang maiingay na jeep, pati na ang kadiliman ng gabi. Magiging musika sa pandinig ko ang bawat alon na humahampas sa dalampasigan. Magiging buhay na alaala ang bawat paglubog ng araw, maging ang kadiliman ng gabi.

Paulit ulit kong gagawin ito, paulit ulit,habang naliligaw pa ang puso mo at hindi pa bumabalik. Paulit-ulit, hanggang ako'y mapagod.

At hindi ako marunong mapagod........

Dahil ganun din kita kamahal.......